வியாழன், 23 ஆகஸ்ட், 2012

கடவுளின் கடவுள் இவர்!! (கவிதை)




அன்னை தெரசா

வெண்ணிற உடையினில்
   வெண்புறா சாயலில்
     வேதவர் உடலுருவம்!
பொன்னிற முகத்தினில்
   பொறுமைக்குப் பரிசாய்ப்
     பொதிந்திட்ட துகச்சுருக்கம்!
தன்னிரு கைகளும்
   தந்திட ஏந்திடும்
     தவத்திரு காட்சியெல்லாம்
என்னிரு கைகளும்
   இரங்கு வார்க்குதவ
     ஏங்குதே என்பதன்றோ!

கருணை மழையினைக்
   கண்களால் பொழிந்திடும்
     கர்த்தரின் தூதுஇவர்!
பொறுமை என்பதின்
   பொருளின் பொருளினைப்
     புரிந்திட வைத்தவரே!
அருமைக் குறள்தந்த
   அன்பின் பொருள்படி
     அமைந்த நற்குணத்தால்
பெருமை என்றுநாம்
   பேசிடும் புகழெனும்
     பேற்றினும் உயர்ந்தவரே!

பெற்றோர் உற்றோரின்
   பற்றினை விட்டவர்
      பார்வைக்குப் புனிதமவர்!
கற்றோர் தேடிடும்
   கல்வியின் பெருமையின்
      கருவாய் இருப்பவரே!
நற்பேர் கொள்வதும்
   நாடினோர்க் உதவிடும்
      நல்மனம் கொண்டதால்
நிற்பார் நெஞ்சினில்
   நலைத்திடும் தியாகத்தின்
      திளைத்திடும் தீஞ்சுடராய்!

மண்மேல் வாழ்ந்திடும்
   மக்களின் மனத்தினில்
      மங்கையர் திலகமவர்!
விண்மேல் வாழ்ந்திடும்
   விண்ணவ தேவர்க்கும்
      விளக்காய் இருந்தவரே!
பெண்போல் இருப்பினும்
   பெற்ற நற்குணத்தால்
      பேசிடும் தெய்வமிவர்!
கண்முன் தெரிந்திடும்
   கருத்தினில் புகுந்தநல்
      கடவுளின் கடவுளிவர்!!




அருணா செல்வம்.

புதன், 22 ஆகஸ்ட், 2012

தலை(வர்)கள்!! (கவிதை)




நிலைபோல் வாழ்க்கை இருக்குமென்றே
    நிமிர்ந்த நெஞ்சாய் வலம்வருவர்!
விலைபோல் ஏறி இறங்காமல்
    விதியை வெல்வோம் எனநினைப்பர்!
அலைபோல் ஆட்சி வந்துபோயும்
    ஆளும் வழக்கை மாற்றமாட்டார்!
இலைபோல் மரத்தில் தலையசைக்கும்
    இனமாய் நம்மை எண்ணிடுவார்!

மலைபோல் உயர்ந்த மனமுடையோர்
    மறுவி விட்டார் நம்மிடையே!
சிலைபோல் நாமும் நின்றிருந்தால்
    சின்னப் புழுவும் சீறியெழும்!
உலைபோல் கொதித்த மனத்துடனே
    ஒன்றி ஓங்கிக் குரல்கொடுத்தால்
தலைபோல் இருந்த வாலெல்லாம்
    தாவிக் குதித்தே ஓடிவிடும்!!




அருணா செல்வம்.

ஞாயிறு, 19 ஆகஸ்ட், 2012

நீ.. வேண்டுமடி!! (கவிதை)




அழகாக ஒளிர்கின்ற
   அருஞ்சொற்கள் அமுதமடி!
குழலாக இசைக்கின்ற
    கொஞ்சுமொழி இனிமையடி!
பழமாக இனிக்கின்ற
    பாடல்கள் புதுமையடி!
நிழலாகத் தொடர்கின்ற
    நினைவலையால் தனிமையடி!

 கற்பனையாம் குதிரைகளின்
    காலெல்லாம் உடைந்துவிட
பற்பலவும் எண்ணுகின்ற
    பறவைமனம் சோர்ந்திடுதே!
விற்கின்ற பொருளென்றால்
    விலைகொடுத்து வாங்கிடலாம்!
பொற்றமிழ்க் கவிபிறக்கப்
    பொன்மகள்..நீ வேண்டுமடி!


அருணா செல்வம்

வெள்ளி, 17 ஆகஸ்ட், 2012

பேதையாக்கி விட்டாயே!! (கவிதை)



 பெருகிடுதே ஆசைவெல்லம்
    பெண்ணழகே என்செய்தாய்!
உருகிடுதே அன்புநெஞ்சம்
    உண்ணாமல் துவண்டேனே!
மருண்டிடுதே மான்விழியோ
    மனம்மயங்கிக் கிடந்தேனே!
விரும்பிடுதே அழுதமொழி
    வேண்டிடவும் தருவாயா?

கண்ணென்றும்! மணியென்றும்!
    கனியென்றும்! கலையென்றும்!
பண்ணென்றும்! பாவென்றும்!
    பாடுகின்ற குயிலென்றும்!
உண்ணென்றும்! உணவென்றும்!
    ஊட்டுகின்ற தாயென்றும்!
பெண்ணுன்னைப் பாடவைத்துப்
    பேதையாக்கி விட்டாயே!!


 அருணா செல்வம்

புதன், 15 ஆகஸ்ட், 2012

தேவதை போனது எங்கே? (கவிதை)




இருவிழி போடும் ஆட்டம்!
    இளமையை என்னுள் ஊட்டும்!
கருவிழி ஒளியின் பாய்ச்சல்
    கவியெனைக் கிழித்துப் போடும்!
திருவிழி அமுதம் உண்ணத்
    திரண்டிடும் ஆசை கோடி!
அரும்விழி வலையில் சிக்க
    ஆழ்ந்தவன் தேடு கின்றேன்!

பூவகை யாவும் தோற்கும்
    பொன்மலர் முகத்தின் முன்னே!
பாவகை முந்தி வந்து
   பாடவே என்னைத் தூண்டும்!
மூவகைக் கனியின் தேனை
    மொழிந்திடும் சொற்கள் ஊட்டும்!
தேவதை போன தெங்கே?
    தென்றலே! தேடிச் செல்வாய்!



கவிமனத்தில் “போகப் போகத் தெரியும்“ பாகம்- 21
தட்டுங்கள்  http://kavimanam.blogspot.fr/

அருணா செல்வம்

செவ்வாய், 14 ஆகஸ்ட், 2012

சுதந்திர கூடு!! (துளிப்பா)



66 ஆண்டுகளாகச்
சுதந்திர கூட்டுக்குள்
வாழ்ந்து கொண்டுதாம்
இருக்கிறோம்!
பறக்க முடியாமல் இல்லை
பழக்க தோசத்தால்!!


அருணா செல்வம் 

திங்கள், 13 ஆகஸ்ட், 2012

மோதல் கூட மோகம்தான்!! (கவிதை)



அறமும் அன்பும் இல்வாழ்வில்
    அமையும் அழகை எடுத்துரைத்தார்!
புறமும் பொறையும் பொதிந்துவிடப்
    புகழைப் பெறவே வழிசொன்னார்!
பிறனில் விழையாத் தன்மையினால்
    பெருகும் பேற்றை வகுத்திட்டார்!
துறவும் தவமும் துறந்தோர்க்கே
    பிறவும் சொன்னார் அறப்பாலில்!!

தெரிந்து தெளிதல் என்னென்றும்
    தெளிவு என்ப(து) என்னென்றும்
அறிவாம் உடைமை என்னென்றும்
    அரணும் என்ப(து) என்னென்றும்
குறிப்பும் அறிதல் என்னென்றும்
    குடிமைப் பெருமை என்னென்றும்
பெரியார் துணையும் வேண்டுமென்றும்
    பிரித்து உரைத்தார் பொருட்பாவில்!

மோதல் கூடக் காதலிலே
    மோகம் என்று மொழிந்திட்டார்!
மாதர் கொண்ட ஆசைகளை
    மனத்தில் கொண்டு வரைந்திட்டார்!
பாதல் படைக்கும் பாவலர்கள்
    படித்தால் கவிதை வளம்பெருகும்!
காதல் சிறப்பைக் கருத்துடனே
    கவிதை படைத்தார் இன்பத்தில்!!

அருளாய் நெறியாய் அமுதமாய்
    அழகாய் ஒழுங்காய் அறிவுடனும்
கருத்தாய் அமைந்த கவியமுதைக்
    கருத்தில் கொண்டு படித்திட்டால்
அருளும் பொருளும் என்னென்றும்
   அமைந்த வாழ்க்கை மெய்யென்றும்
உருளும் மனமும் பொய்யென்றும்
    உயர்ந்த கருத்தை அறிந்திடலாம்!!

அருணா செல்வம்

(தலைப்பைப் பார்த்துவிட்டு வந்தவர்கள் என்னைத் திட்டாதீர்கள். இப்படியெல்லாம் தலைப்புப் போட்டால் தான் என் வலையைத் திறக்கிறார்கள். அதனால் தான்! பெரியவர்கள் மன்னிக்கணும்)

சனி, 11 ஆகஸ்ட், 2012

இதயம் ஏந்தி வணங்குகிறேன்!!! (கவிதை)




திருக்குறள்.

சின்னச் சின்னச் சொல்லெடுத்துச்
    செந்தேன் கடலில் ஊறவைத்துக்
கன்னல் கொடியில் நாரெடுத்துக்
    கனியின் சாற்றில் நனைத்தெடுத்து
வண்ண வண்ணப் பூக்களினை
   வடிவாய்க் கைகள் தொடுப்பதுபோல்
கன்னித் தமிழைச் சேர்த்தெழுதிக்
    கவியில் கருத்தைத் தொடுத்தாரோ?

எண்ணம் எல்லாம் தமிழாகி
    எழுதும் எழுத்தில் கலந்துவிட
விண்ணில் பூத்த விண்மீனே
    வேண்டி வந்து விழுந்துவிடப்
பொன்னில் வார்த்த பொற்பூப்போல்
    பொலிந்து சொற்கள் மின்னிவிடக்
கண்ணில் இருக்கும் பாவையைப்போல்
    கருவை உருவாய்ச் சேர்த்தாரோ?

அருளும் பொருளும் இன்பமென
    அழகாய்ப் பிரித்தார் முப்பாலில்!
உருளும் மனத்தை நிலைநிறுத்த
    உயர்வாய்ச் சொன்னார் அறப்பாலில்!
இருளும் மனிதர் வாழ்வுயர
    ஏற்றம் மொழிந்தார் பொருட்பாலில்!
மருளும் மங்கை மனம்மகிழ
    மதுவைக் கலந்தார் இன்பத்தில்!

எதுதான் இல்லை திருக்குறளில்?
    எடுத்துப் புரட்டிப் பார்த்திட்டேன்!
மதுதான் குறள்கள் ஒவ்வொன்றும்
    மனத்தை நன்றே மயக்கிவிடும்!
அதுதான் அன்பும் அறத்தையும்
    அழியாப் புகழை அளிக்கிறது!
இதுதான் வாழ்க்கைத் தத்துவமே!
    இதயம் ஏந்தி வணங்க்கிறேன்!!


(குறளின் பெருமை தொடரும்)
அருணா செல்வம்.

வெள்ளி, 10 ஆகஸ்ட், 2012

இன்பத்தின் இருப்பிடமே...!!! (கவிதை)




சொல்லெல்லாம் உனைப்பாடச்
   சுகம்பெற்றுச் சுடருதடி!
பல்லெல்லாம் முத்தாகப்
   பளபளத்து மின்னுதடி!
புள்ளெல்லாம் பறப்பதுபோல்
   நற்புலமை சிறக்குதடி!
உள்ளெல்லாம் உன்நினைவு   
   ஊற்றாக ஊறுதடி!

அணைவிட்டு அடைத்தாலும்
   ஆசையலை அடங்கிடுமோ!
கணையிட்டு மன்மதனும்
   கால்வலிக்கக் காத்துள்ளான்!
உனைத்தொட்டுக் கவிபடைக்க
   உன்னருளே வேண்டுமடி!
இணையிட்டு எதைச்சொல்வேன்!
   இன்பத்தின் இருப்பிடமே!!


அருணா செல்வம்.