சட்டென்றே ஒருமுத்தம் !!

ஒத்தையடிப் பாதையிலே

ஒத்தையிலே நடக்கையிலே

அத்தைமகன் முன்வந்தான்

ஆசையிலே வழிமறித்தே

முத்தமொன்று கொடுத்துவிட்டு

முன்னேறி போவென்றான்!

“கத்திஊரைக் கூப்பிடுவேன்“

கனப்பொழுதில் சொன்னாலும்

ஏக்கத்தில் அவன்பார்வை

ஏதெதுவோ செய்ததனால்

தாக்கத்தில் வழிவிட்டும்,

தயங்கியேதான் நின்றுவிட்டாள்!

நோக்கத்தைப் புரிந்துகொண்டும்

நூதனமாய்த் தனைப்பார்க்க

“ஏக்கமொன்றும் எனக்கில்லை“

என்றுசொல்லித் தள்ளிவந்தாள்!

அஞ்சிகொண்டு நில்லாமல்

அலட்சியமாய் வந்தாலும்

மஞ்சத்தில் அனல்பறக்க

மங்கையவள் உறங்காமல்

கொஞ்சுமொழி கண்பேச

குறும்பாகச் சிரித்தவனை

நெஞ்சுநிறை சுமர்ந்துகொண்டு

நெடுநேரம் விழித்திருந்தாள்!

தொட்டணைக்க உரிமையுள்ள

தோதான அத்தைமகன்!

சட்டென்றே ஒருமுத்தம்

தந்துவிட்டு வந்திருந்தால்

கட்டான காளையவன்

கனவினிலே வந்திருப்பான்!

பட்டென்றே ஏன்வந்தோம்?

பண்பின்றி ஏக்கமுற்றாள்!

அருணா செல்வம்.

22.04.2013

மழலை மொழி!!

சின்னப் பூபோல்

   சிரிக்கும் வாயால்

      சிந்தும் மழலைமொழி

கன்னித் தமிழைக்

   கன்னல் தேனில்

      குழைத்த கவிதையடி!

உன்னில் இருந்து

   உலகை மறந்து

      உதிரும் சிரிப்பொலியோ

பொன்னை உருக்கிப்

   பூவில் நனைத்துப்

      பொழியும் இன்பமடி!!

அருணா செல்வம்.

நீதி மன்றம்!!

 

நாட்டில் நடக்கும் வஞ்சகங்கள்

    நன்றாய்த் தெரிந்தே நடந்தாலும்

ஏட்டில் அவைநாம் எழுதிவிட்டு

    ஏதோ மனத்தை ஆற்றுகின்றோம்!

வீட்டில் அவையே நடந்துவிட்டால்

    விம்மிப் புடைத்தே எழுந்துவந்து

நீட்டி அளந்து நீதிசொல்லும்

   நீதி மன்றில் வழக்கிடுவோம்!

   

தவற்றைச் செய்த கயவனிவன்!

    தர்க்கம் பண்ணத் தேவையில்லை!

இவனே திருடன் எனத்தெரிந்தும்

    இன்னோர் கூட்டம் அதைமறுக்கும்!

சவமாய் நடுவர் அமர்ந்துகொண்டு

   சாட்சி வேண்டும் எனச்சொல்லிக்

கவர்ந்து பேசும் பேச்சிற்குக்

   காலம் தருவார் வாய்தாவாய்!!

நீதி வேண்டும் எனச்சொல்லி

   நீதி கேட்டு நாடிநின்றால்

பாதி வாழ்க்கை ஓடிவிடும்!

   பணமும் தேய்ந்து பிறையாகும்!

வாதி பிரதி வாதியென

   வழக்கு நடக்கும் தொடர்வாக

மீதி இருக்கும் மனத்தெளிவும்

   மீள முடியாக் கர்விக்கும்!!

நமக்கு நீதி வேண்டுமென்றால்

   நடுவர் வேண்டாம் நயமாக!

தமக்கோ எங்கே ஆதாயம்

   தாமாய்க் கிடைக்கும் எனப்பார்ப்பார்!

உமக்கு நீதி வேண்டுமென்றால்

   ஊழின் காலில் அதைக்கட்டி

எமக்கோ ஏதும் தேவையில்லை

    என்றே இருத்தல் நன்னீதி!!

அருணா செல்வம்.

12.04.2013

கறுப்புத் துணியைக் கழற்றிஎறி!

வாய்மை வெல்லும் எனச்சொல்லி

    வழக்கு மன்ற நடுவினிலே

தாய்மை கொள்ளும் பெண்ணிடத்தில்

    தராசைக் கையில் கொடுத்துவிட்டு

தூய்மை நீதி தேவதையாய்த்

   துணிவாய் உன்னை நிற்கவைத்தார்!

வாய்யைத் திறக்க வழியில்லை

   வாய்..மெய் பேசும் நிலையில்லை!!

  

பெண்மை என்றும் மென்மையென

    பெருமை பேசி சிலைவடித்தே

வெண்மை நிறத்தில் உடைகொடுத்தே

    வெள்ளை மனமாய் ஆக்கிவிட்டார்!

உண்மை, நன்மை, தீமைகளை

    உணர்ந்து பயந்தி டுவாயென்று

கண்ணைக் கறுப்புத் துணியிட்டு

    கட்டி நடுவாய் நிற்கவைத்தார்!

குருடன் கண்ட யானைபோலே

    குறுக்குப் பேச்சைக் கேட்டுநின்றாய்!

உருவில் உணர்த்தும் உண்மைகளை

    ஒளித்து வைக்க முடியாது!

திருட்டுப் பார்வை காட்டிவிடும்!

    தீர்ப்பைச் சரியாய்ச் சொல்வதற்குக்

கருட பார்வை வேண்டுமென்றால்

    கண்ணைத் திறந்து நாலும்பார்!

பெண்ணே! உன்கண் கட்டியதால்

    பேச்சை மட்டும் கேட்டுநின்றாய்!

மண்ணை இழந்து கலங்குபவர்

    மானம் இழந்த பேதையர்கள்

உண்மை மறைத்து நடிப்பவர்கள்

   உன்றன் கண்ணால் அறிந்திடவே

கண்ணைக் கட்டி வைத்திருக்கும்

   கறுப்புத் துணியைக் கழற்றிஎறி!!

அருணா செல்வம்.

11.04.2013