Thursday, 15 May 2014

குட்டி!!




  
குட்டி என்றே தலைப்பிட்டுக்
    கொஞ்சும் தமிழில் பாடவந்தேன்!
மெட்டி போடும் பெண்நானோ
    மெல்ல எண்ணிப் பார்க்கின்றேன்!
புட்டி குட்டி ஆசைகளைப்
    போற்றி மகிழ்வர் ஆண்கள்தான்!
கொட்டி வளரும் கற்பனையில்
    குட்டி என்றே எதையெடுப்பேன்?
 
கட்டிப் போட்ட கன்றினையும்
    காலைச் சுற்றும் பூனையையும்
விட்டே அகலா நாயினையும்
    வெறுத்துத் துறத்தும் எலியினையும்
தொட்டால் சிலிர்க்கும் முயலினையும்
    துள்ளி ஓடும் மானினையும்
குட்டி என்றே அழகாகக்
    கொஞ்சும் கவியில் காட்டிடலாம்!

பிறந்து சிலநாள் ஆனவுடன்
    பெரிய உருவாய் இவைமாறும்!
கறந்த பாலாய் இருந்தகுணம்
    கரடு முரடாய் மாறிவிடும்!
சிறந்த சொல்தான் குட்டி!அது
    சீக்கி ரத்தில் வளர்கிறதே!
புறத்தைக் கண்டே சொல்கின்றோம்!
    பொதுவில் இவைதாம் குட்டியென்றே!

அருணா செல்வம்.
16.05.2014