Monday, 4 June 2012

பூமாலையா? பாமாலையா? (கவிதை)




காலைப் பூக்களைக் கைகளால் பறித்ததும்
       கட்டினேன் பூமாலை!
சோலைப் பூவினுள் தேனினைத் தேடியே
       சுற்றிடும் வண்டொன்று
மாலைப் பூவினுள் மதுவினைக் குடித்திட
       மயங்கியே வந்ததினால்
சேலை நெய்திடும் தறியென என்கையோ
       செய்தது பாமாலை!!

சங்கச் செந்தமிழ் தந்துள பாட்டெனச்
       சாற்றிய பாமாலை!
தங்கத் தேரினில் தமிழ்மகள் வந்திடத்
       தந்துள பூமாலை!
எங்கும் செந்தமிழ்! எதிலும் இன்றமிழ்!
       இயம்பிடும் என்மூளை!
மங்கும் வாழ்வினில் பொங்கிடும் இனிமையை
       வளர்ப்பதே நம்வேலை!