Monday, 15 April 2013

நீதி மன்றம்!!



 
நாட்டில் நடக்கும் வஞ்சகங்கள்
    நன்றாய்த் தெரிந்தே நடந்தாலும்
ஏட்டில் அவைநாம் எழுதிவிட்டு
    ஏதோ மனத்தை ஆற்றுகின்றோம்!
வீட்டில் அவையே நடந்துவிட்டால்
    விம்மிப் புடைத்தே எழுந்துவந்து
நீட்டி அளந்து நீதிசொல்லும்
   நீதி மன்றில் வழக்கிடுவோம்!
   
தவற்றைச் செய்த கயவனிவன்!
    தர்க்கம் பண்ணத் தேவையில்லை!
இவனே திருடன் எனத்தெரிந்தும்
    இன்னோர் கூட்டம் அதைமறுக்கும்!
சவமாய் நடுவர் அமர்ந்துகொண்டு
   சாட்சி வேண்டும் எனச்சொல்லிக்
கவர்ந்து பேசும் பேச்சிற்குக்
   காலம் தருவார் வாய்தாவாய்!!

நீதி வேண்டும் எனச்சொல்லி
   நீதி கேட்டு நாடிநின்றால்
பாதி வாழ்க்கை ஓடிவிடும்!
   பணமும் தேய்ந்து பிறையாகும்!
வாதி பிரதி வாதியென
   வழக்கு நடக்கும் தொடர்வாக
மீதி இருக்கும் மனத்தெளிவும்
   மீள முடியாக் கர்விக்கும்!!

நமக்கு நீதி வேண்டுமென்றால்
   நடுவர் வேண்டாம் நயமாக!
தமக்கோ எங்கே ஆதாயம்
   தாமாய்க் கிடைக்கும் எனப்பார்ப்பார்!
உமக்கு நீதி வேண்டுமென்றால்
   ஊழின் காலில் அதைக்கட்டி
எமக்கோ ஏதும் தேவையில்லை
    என்றே இருத்தல் நன்னீதி!!

அருணா செல்வம்.
12.04.2013