எங்கள் ஊர் பொங்கல்!!

நட்புறவுகளுக்கு வணக்கம்!

     இங்கே (பிரான்ஸ்) நேற்று ஞாயிறு என்பதால் அனைவருக்கும் விடுமுறை. வருடா வருடம் பொங்கல் முடிந்து வரும் ஞாயிறு அன்று எங்கள் ஊரில் உள்ள அனைத்து இந்தியக் குடும்பங்களும் சேர்ந்து ஒன்றாக ஓர் இடத்தில் கூடி பொங்கல் விழாவைக் கொண்டாடுவோம்.

    அப்படிக் கொண்டாடும் பொழுது அனைவரும் சேர்ந்து ஒரு பாடலைப் பாடுவது வழக்கமாக்கி இருக்கிறோம். எப்பொழுதும் அந்த வருடத்தின் பிரபலமான சினிமா பாடல் ஒன்றின் மெட்டை எடுத்துக்கொண்டு பொங்கல் விழாவிற்குத் தகுந்த படி மாற்றி எழுதித்

தருவேன். அனைவரும் சேர்ந்து பாடி மகிழ்வோம்.

    நேற்று நடந்த பொங்கல் விழாவில் வித்தியாசமாக நண்பர் ஒருவர் அவரின் விருப்பம் போல் மெட்டமைத்துக் கொடுக்க நான் பாடலை எழுதி கொடுத்தேன். அனைவரும் சிறப்பாகப் பாடினார்கள். அந்தப் பாடலை நீங்களும் படித்துப் பாருங்கள்.

பொங்கல் பாடல் 20.01.2013

பொங்கும் புது பொங்கல்

   இங்குப் புதிதாய்ப் பொங்கியது!

எங்கும் மகிழ் வெள்ளம்

   பொங்கி இனிதாய் மலர்ந்தது!

அன்புடனே நாமெல்லாம்

   ஒன்றாய்க் கூடுவோம்!

பண்புடனே ஒற்றுமையால்

   சேர்ந்தே வாழ்திடுவோம்!

எல்லா நலமும் இனிதே பெற்று நாமும் வாழுவோம்!

பொங்கல் வாழ்த்துக்கள் - எல்லோர்க்கும்

பொங்கல் வாழ்த்துக்கள்  -2

நிறைமனம் கொண்டே பொங்கல் விழாவில்

    அனைவரும் சேர்ந்திடுவோம்!

இறையருள் பெற்றே இன்ப வாழ்வின்

    உயர்வைக் கண்டிடுவோம்.

உண்மைக்கும் உறவிற்கும் தோள்கொடுப்போம்!

   உயர்வான நட்புக்கு உயிர்கொடுப்போம்!

என்றுமே ஒற்றுமையில் உயர்ந்திடுவோம்!

   இதயத்தில் அன்பினை வளர்த்திடுவோம்!

பொங்கல் வாழ்த்துக்கள் - எல்லோர்க்கும்

பொங்கல் வாழ்த்துக்கள்  -2

இந்த நாளினில் சேர்வதால்

   நம்மனம் மகிழ்ந்திடுமே!

எந்த நீதியும் நேர்மையும்

   நெஞ்சில் நிறைந்திடுமே!

பொங்கல் வாழ்த்துக்கள் - எல்லோர்க்கும்

பொங்கல் வாழ்த்துக்கள்  -2

அருணா செல்வம்.