தென்றலே ஏன்வந்தாய் செப்பு?

 

ஊடலின்றி அன்புமிகுந்(து) ஊற இருந்தவளைக்
கூடலுடன் கோமகன் கொஞ்சாமல் - வாடவிட்டுப்
பொன்பொருள் கொண்டுவரப் போயிருக்கும் வேளையில்
தென்றலே ஏன்வந்தாய் செப்பு?
.
பாவலர் அருணா செல்வம்
17.10.2020

காத்திருங்கள் காதலிக்கிறேன், சிறுகதை,

என்னை ஏதோ செய்துவிட்டாள்!

 

.

பட்டப் படிப்பே உயர்வென்று
படிப்பை மட்டும் பார்த்திருந்தேன்!
பட்டித் தொட்டி படம்பார்க்கும்
பாழும் மனத்தை அடக்கிவிட்டேன்!
 
சொட்டுத் தேனாய் வந்துநின்றாள்
சொக்கிப் போயே மாறிவிட்டேன்!
கட்டுக் கடங்கா ஆசையுடன்
கனவு உலகில் மிதக்கின்றேன்!
 
கண்ணுள் புகுந்து கொண்டாளோ
காணும் இடத்தில் தெரிகின்றாள்!
மண்ணில் எதையும் நான்மறக்க
என்னை ஏதோ செய்துவிட்டாள்!
.

 பாவலர் அருணா செல்வம்

சிறுகதை - 5, தன்மானம், மாமியார் மருமகள் கதை, Short story, SIRUKATHAI, A...

காதல் பாடல், காதல் வந்தது பொய்மையோ, பாடல் அருணா செல்வம், ...

சிறுகதை, தண்ணி அடிக்க வா புள்ள, SIRUKATHAI, Short story, 4,அருணா செல்வம...

காதல் வந்தது பொய்மையோ!

 

கண்கள் மின்னிடும் கன்னிப் பார்வையில்
    காந்த சக்திதான் உள்ளதோ!
எண்ணம் துள்ளிட ஏக்கம் சேர்ந்திட
    இன்னல் பூத்துடன் ஈர்க்குதே!
விண்ணில் சுற்றிடும் வெப்பச் சூரியன்
    விஞ்சிப் பார்வையில் வந்ததோ!
மண்ணில் என்னுடல் மங்கித் தொங்கிட
    வண்ணம் பெற்றுடன் வேர்க்குதே!
 
கன்னம் என்பது கன்னல் சாற்றினில்
    கட்டிப் போட்டஓர் அங்கமோ!
மின்னும் பற்களில் மேன்மை வெண்ணிலா
    மெச்சி அவ்விடம் நின்றதோ!
தென்னங் கீற்றெனத் தீண்டுங் கூந்தலில்
    திங்கள் பூவெனப் பூத்ததோ!
பொன்னில் தட்டிய பொத்தல் பொற்சிலை
    பொங்கிப் பொன்னுடல் பெற்றதோ!
 
சுற்றி வந்தவள் சுற்ற வைத்தது
    சொக்கும் கட்டுடல் பெற்றதோ!
உற்று நோக்கிய ஊழ்மை என்னிலை
    உந்தித் தள்ளிய உச்சமோ!
முற்றும் போக்கிய முத்தி யற்றதால்
   முந்தி நின்றதே உண்மையோ!
கற்றுப் பெற்றதைக் காற்றில் விட்டிடக்
   காதல் வந்தது பொய்மையோ!
.
பாவலர் அருணா செல்வம்
12.10.2020

SIRUKATHAI, Short story, ஆளுக்கொரு நீதி, சிறுகதை, arouna selvame, விதவை...

Short story, சிறுகதை, வேலியில்லாப் பயிர், Histoire courte, அருணா செல்வம்...

பஞ்ச பங்கி! (ஒன்றில் ஐந்து)

 

தமிழே!
 
ஆசிரியப்பா!
பெருங்கலை என்றே பிணைந்த தமிழின்
அருங்க லையாள்! வருங்கலை வாழ்த்தும்
தருங்கலை என்னும் வளமு டையாள்!
பெரும்பகை போக்கும் பெருவுளம் கொண்ட
குலமு டையாள்! திருவென இன்ப
நலமி சைபாள் செம்மைத் தமிழ்மகளே!
இனிய சொற்கள் இனிமை பயக்கும்!
கனியின் சுவையாய்க் கருத்தை இழுக்கும்!
தனியாய் நின்று தழைக்கும் அழகாய்
வனிதம் கொண்ட வளமுடை தமிழே!
அணியாம் இலக்கணம் ஆண்ட தமிழாள்
துணிவைத் தருவாள்! தொடர்ந்து படிக்கும்
மனத்தில் பணிவை வளர்த்து, வெடிக்கும்
சினத்தை வெறுத்து, முடிக்கும் செயலில்
நினைவைச் செலுத்த நாளும் உயர்வோம்!
பனைபோல் உயர்ந்து! பண்ணின் அழகில்
மனத்தைப் பதிக்க மண்ணும் அழகாம்
தினமும் மதியில் திங்கள் ஒளியாம்!
சிறந்த தெளிவு தங்கிச் சிறக்கும்!
பறக்கும் தமிழாய்ப் பாடித் திரியும்!
புலவர் பாட்டில் கூடிப் பொலியும்!
புலமை கொஞ்சும் தமிழே உன்னைப்
படிக்க உள்ளம் படரும்! மின்னும்
படியாய் எண்ணம் மிளிரும்! நன்மை
இன்மை காட்டும் இனியவளே
என்றும் என்னுள் இருப்பாய் இசைந்தே!
 
கட்டளைக் கலித்துறை!
 
பெருங்கலை என்றே பிணைந்த தமிழின் அருங்கலையாள்!
வருங்கலை வாழ்த்தும் தருங்கலை என்னும் வளமுடையாள்!
பெரும்பகை போக்கும் பெருவுளம் கொண்ட குலமுடையாள்!
திருவென இன்ப நலமிசைப்பாள் செம்மைத் தமிழ்மகளே!
 
கலிவிருத்தம்!

இனிய சொற்கள் இனிமை பயக்கும்!
கனியின் சுவையாய்க் கருத்தை இழுக்கும்!
தனியாய் நின்று தழைக்கும் அழகாய்
வனிதம் கொண்ட வளமுடை தமிழே!
 
குறள் வெண்பா!

அணியாம் இலக்கணம் ஆண்ட தமிழாள்
துணிவைத் தருவாள் தொடர்ந்து!
 
நேரிசை வெண்பா!

படிக்கும் மனத்தில் பணிவை வளர்த்து
வெடிக்கும் சினத்தை வெறுத்து – முடிக்கும்
செயலில் நினைவைச் செலுத்த நாளும்
உயர்வோம் பனைபோல் உயர்ந்து!
 
வஞ்சிப்பா!

பண்ணினழகில் மனத்தைப்பதிக்க
மண்ணுமழகாம்! தினமும்மதியில்
திங்களொளியாம்! சிறந்ததெளிவு
தங்கிச்சிறக்கும்! பறக்கும்தமிழாய்ப்
பாடித்திரியும்! புலவர்பாட்டில்
கூடிப்பொலியும்! புலமைகொஞ்சும்
தமிழே
உன்னைப் படிக்க உள்ளம் படரும்
மின்னும் படியாய் மிளிரும் எண்ணம்!
நன்மை இன்மை காட்டும் இனியவளே
என்றும் என்னுள் இருப்பாய் இசைந்தே!
-
பாவலர் அருணா செல்வம்.
.
(பஞ்சபங்கி என்பது ஒரு பொருள் குறித்த ஒரு பாடலை ஐந்து வேறு வகையான பாடலாக பொருள் மாறாமல் பகுத்துப் பாடப் படுவதாகும். பஞ்ச என்பது ஐந்து என்றும் பங்கி என்பது பகுத்தல் என்றும் பொருளாகும்.)