பெண்ணின் இதயம்!! (கவிதை)

பெண்ணின் இதயம் பாவம்தான்!

    பேசும் ஆணின் பொய்புரிந்தும்

விண்ணில் தன்னை மிதக்கவிட்டு

    வீணே கனவு கண்டிருக்கும்!

கண்ணால் காணும் காட்சியையும்

    காதால் கேட்கும் வார்த்தையையும்

மண்ணில் விழுந்த மழைத்துளியாய்

    மனத்தில் நிறுத்தி வைத்திருக்கும்!

நன்மை ஒன்றே நினைத்திருக்கும்!

    நட்பு நாடி மகிழ்ந்திருக்கும்!

மென்மை கொண்ட வார்த்தைகளால்

    மேனி யெங்கும் சிலிர்க்கவைக்கும்!

அன்பு பாசம் காதலென்று

    அனைத்தும் வைத்து மகிழ்ந்தாலும்

துன்பம் என்று வரும்போது

    துடித்துத் துவண்டு அழுதிருக்கும்!

நல்ல கலைஞன் கலையிதயம்

    நன்றாய் மகிழும் பாராட்டால்!

வல்ல தலைவன் நல்லிதயம்

    வாழ்த்தி நம்மை வாழவைக்கும்!

கல்போல் இதயம் கொண்டோரால்

    கவலை கடலில் மிதக்கவிடும்!

சொல்லும் வார்த்தைச் சுவைமிகுந்தால்

    சுற்றம் போற்றச் சுமைமறக்கும்!

பிடித்துப் பிடித்து வைத்தாலும்

    பெருகும் ஆசை வெள்ளத்தால்

நடித்து நடித்து வாழ்ந்துவரும்

    நடிக மனித நெஞ்சிற்குள்

துடித்துத் துடித்து வாழவைக்கும்

   தூங்கா(து) இருக்கும் இதயத்தை

வடித்து வடித்து அழவைக்கும்

    வாழ்வை இறைவன் தந்ததேனோ?

அருணா செல்வம்.