சிரிக்கவும் - சிந்திக்கவும்!!

                   

எலியை அகற்றும் வழி!

    முல்லா நஸ்ருத்தீன் துருக்கி நாட்டில் பிறந்த அறிஞர்.

    வேடிக்கையாகக் கதைகள் சொல்வதில் உலகப்புகழ் பெற்றவர். இவரது கதைகள் சிரிக்க மட்டுமல்ல, சிந்திக்கவும் வைக்கும்.

    அவரது குள்ளமான தோற்றத்தைக் கண்டு பலரும் அவரைக் கிண்டல் செய்வர். ஆனால் முல்லா நஸ்ருத்தீன் தனது அறிவைக் கொண்டு அவர்களின் மூக்கை உடைத்து விடுவார்.

    அவரின் கதையிலிருந்து....

  

    ஒரு நாள்...

    ஒரு மனிதன் அவரைக் கிண்டல் செய்யும் எண்ணத்தோடு அவரிடம் வந்தான்.

    “வணக்கம் முல்லா அவர்களே!“

    “வணக்கம்! வணக்கம்!“

    “எனக்கொரு பிரட்சனை முல்லா அவர்களே!“

    “என்ன பிரட்சனை?“

    “நேற்று இரவு நான் உறங்கிக் கொண்டிருந்தேன்!“

    “ம்“

    “அப்பொழுது திறந்திருந்த என் வாயின் வழியே ஓர் எலி நுழைந்து விட்டது!“

    “அடடா...“

    “எலி வயிற்றுக்குள் போய் விட்டது.“

    “ஐயோ... அப்புறம் என்ன ஆனது?“

    “அது தான் பிரட்சனை முல்லா அவர்களே. அந்த எலியை அகற்றுவதற்கு வழி தெரியாமல் தவிக்கிறேன். அதற்கு தாங்கள் தான் ஒரு நல்ல வழி சொல்ல வேண்டும்“ என்றான்.

    அந்த மனிதன் தன்னைக் கிண்டல் செய்கிறான் என்பதை உணர்ந்த முல்லா நஸ்ருத்தீன், சற்று யோசித்துப் பிறகு சொன்னார்.

    “அப்படியா...? ஒன்றும் கவலைப்பட வேண்டாம். அன்பரே... அந்த எலியை அகற்ற ஒரு வழி இருக்கிறது.“ என்றார்.

    “என்ன வழி அது?“ அவன் சற்று ஏளனமாகக் கேட்டான்.

    “ஒரு பூனையைப் பிடித்து விழுங்கி விடு. சரியாகிவிடும்“ என்றார் முல்லா.

     இந்த பதிலை எதிர்பார்க்காத அந்த மனிதன் உடனே அந்த இடத்தை விட்டு நகர்ந்தான்.

(எப்போதோ படித்தது)

அருணா செல்வம்.