என்னடி செய்தாய் என்னை?

என்னடி செய்தாய் என்னை?

என்னேரமும் உன் நினைவே!

எண்ணிரு முறைதான் பார்த்தாலும்

என்னுள் வந்து கலந்தாயோ!

தன்னை மறந்த உலகம் என்பது

துன்பம் மறந்து உறங்குவதாம்!

என்னை மறந்து உறங்குகிறேன்!

எண்ணம் உன்னை மறக்கவில்லை!

எழுத அமர்ந்த போதும் நீ

எழுத்தில் தெரிந்து சிரிக்கின்றாய்!

எழுந்து போக நினைத்தாலோ

ஏக்கமாய் என்னைப் பார்க்கின்றாய்!

எண்ணச் சிறகை விரித்து நானோ

விண்ணில் பறக்கும் பொழுதெல்லாம்

கண்ணில் தெரியும் கற்பனைகள்

வண்ணத் தமிழின் வடிவாகும்!

இன்று அந்த நிலையில்லை!

என்ன நினைத்த அமர்ந்தாலும்

என்னில் தெரியும் காட்சியெல்லாம்

இன்பம் பொங்கும் உன்னுருவே!

தமிழைத் தொழுது எழுதிய கை

உமிழ்ந்த சொற்கள் அமிர்தமடி!

நிமிர்ந்து உன்னைக் கண்டதாலோ

தமிழில் மரபும் நழுவுதடி!

பண்ணடி பாக்கள் புனைந்தேன்! உன்

கண்ணடி பட்டதால் எனைமறந்தேன்!

என்னடித் தமிழில் பின்னலிட

என்னடி செய்தாய் என்னை?

அருணா செல்வம்.

(பழசு...!!)