சுழலும் உலகம் சுகம்பெருக
சொரியுங் கருணை விழியுடனும்
அழகாய் உடலும் உயிருடனும்
அமைதி கொண்ட முகமுடனும்
மழலை மொழியும் இதழுடனும்
மனத்தைக் கவரும் ஒளியுடனும்
குழந்தை ஏசு பிறந்துள்ளார்
குவியும் இனிமை இனியெங்கும்!
துன்பம் யாவும் விலகிவிடும்!
துணிவு தொடர்ந்து துணையாகும்!
இன்பம் பொங்கி வழிந்தோடும்!
இதயம் நிரம்பி மகிழ்ந்தாடும்!
பொன்னும் பொருளும் புகழோடு
பொதிந்தே நம்மின் பின்தொடர
அன்னை போலே வந்துள்ளார்!
அகில மெங்கும் இன்புறவே!
.
பாவலர் அருணா செல்வம்
24.12.2023
கருத்துகள் இல்லை:
கருத்துரையிடுக